Mbyllet procesi i votimit në të 6 bashkitë, Shkodër, Dibër, Durrës, Vorë, Lushnje e Rrogozhinë. Procesi, i cili filloi në orën 07 00 të mëngjesit dhe zgjati deri në orën 19 00 të mbrëmjes, tregoi që kishte një pjesëmarrje jo shumë të lartë në të gjitha qendrat e votimit, në të 6 bashkitë. Pjesëmarrje më të lartë të votuesve e kishte qarku i Dibrës, me 43.35 % , e ndjekur nga Vora me 40.33%. Lushnja po ashtu ka qenë po në të njëjtat shifra si Vora, me një diferencë të vogël votuesish. Në Lushnje kanë marrë pjesë në votim 35.96 për qind e votuesve. Rrogozhina deri në orën 19 00 të mbrëmjes ka patur një pjesëmarrje prej 30.92 %, duke u ndjekur nga qarku i Shkodrës me 29.11%. Ndërsa Durrësi ka patur nivelin më të ulët të pjesëmarrjes, krahasuar me bashkitë e tjera, me 26.4%. Të drejtë vote kishin 654 mijë e 538 shtetas shqiptarë. 10 mijë e 134 qytetarë ishin votues për herë të parë, ndërsa 135 shtetas nuk janë përfshirë në lista për shkak të dekriminalizimit. Gjithsej në të 6 bashkitë, kanë qenë 941 Qendra Votimi në dispozicion të qytetarëve për të ushtruar të drejtën e votës. 3 qendra votimi në Shkodër, nuk ishin në shërbim të qytetarëve dhe u shpallën si të pavlefshme dhe kjo për shkak të motit të keq. Procesi zgjedhor u anulua në zonën e Shoshit dhe Pultit në Bashkinë e Shkodrës, pasi kaloi afati kohor. Moti i keq gjithashtu e bëri të pamundur dërgimin në kohë të materialeve zgjedhore.