Në më pak se një vit, Prokuroria e Posaccme Antikorrupsion përfundoi hetimet për ish kryebashkiakun Jorgo Goro dhe depozitoi pranë GJKKO kërkesën për kalimin e dosjes për gjykim në ngarkim të tij si dhe të katër personave të tjerë, Jerasimo Bashi, Bilbil Aliaj, Vezir Gjikokaj dhe Stavri Mëhilli.Përgjatë periudhës hetimore, SPAK ka arritur të evidentojë se Goro në bashkëpunim me Bashin, ish Drejtor i Drejtorisë së Menaxhimit dhe Mbrojtjes së Tokës pranë Bashkisë Himarë, në bashkëpunim me njëri tjetrin, kanë kryer veprime dhe mosveprime në kundërshtim me ligjin.Të dy ata sipas SPAK, kanë dërguar pranë ZVRPP-së Vlorë një shkresë, ku bashkëngjitur me të ishte një dokumentacion, i cili përmante të dhëna të rreme, për një pasuri në favor të Foto Mëhillit, babait të Stavri Mëhillit. Më tej, ata konfirmuan një plan rilevimi me një vendndodhje gjeografike të pasurisë, totalisht të ndryshme nga ajo që përcakton dokumentacioni pronësor. Kësaj pasurie, ata i dhanë një numër të pabazuar në asnjë të dhënë fakti dhe totalisht në kapërcim të kompetencave që u njeh ligji. Struktura e Posaccme sqaron se ky plan, shërbeu për procedurën e zhvillimit të pronës deri në lëshimin e Lejes së Ndërtimit në emër të shoqërisë “AG.TCC” sh.p.k.Sa i përket rolit të Bilbil Aliaj dhe të Vezir Gjikokaj, organi i akuzës thotë se ata kanë lëshuar vërtetimin nga dokumentat hipotekorë në emër të Foto Mëhillit, duke kryer veprime të kundërligjshme. Madje ata pranuan si dokument ligjor një akt formular të falsifikuar, sa përket sipërfaqes prej 5512 m2, të llojit “Truall” si dhe një tjetër formular që bën fjalë për të njtën pasuri, edhe kjo e falsifikuar. Dy të pandehurit kanë nënshkruar vërtetimin nga dokumentat hipotekorë, i cili provon regjistrimin e pronësisë në një zonë të pamenaxhuar.Ndërsa Stavri Mëhilli ka përdorur më shumë se një herë dy formularë të falsifikuar. Ai po ashtu ka shitur pasurinë e përfituar nga kryerja e veprave penale duke qenë në dijeni të plotë të prejardhjes kriminale të saj. SPAK e akuzon Jorgo Goron për kryerjen e veprës penale “Shpërdorimi i detyrës”, kryer 2 herë, dhe “mosdeklarimi, i pasurive”. Ky i fundit u kallëzua në SPAK nga ish kryebaashkiaku tjetër i Himarës Fredi Beleri, i cili përfundoi dënimin pak javë më parë.