“Daily Mail” u ka kushtuar një shkrim dy vëllezërve shqiptarë, të cilët sipas tabloidit britanik të njohur për artikujt me doza të larta antishqiptare, nga azilkërkuar ngritën në Britaninë e Madhe një perandori droge me vlerë mbi 400 milionë euro. Artikulli i kushtohet vëllezërve Artur dhe Klevis Hoxhosmani, ku tabloidi britanik paraqet historikun se si u shndërruan ata nga azilkërkues dhe punonjës lavazhesh në drejtues të një grupi të strukturuar kriminal përgjegjës për trafikun e të paktën 6 tonëve kokainë në Britaninë e Madhe. DailyMail përshkruan jetën luksoze të dy vëllezërve, që për vite me radhë jetuan mes Londrës, Francës së Jugut, Shqipërisë dhe Dubait. Aty flitet për jahtet dhe vilat e zotëruara prej tyre, teksa shkruhet edhe për arrestimin nga SPAK në korrik të këtij viti në një operacion kundër grupit të tyre. SPAK e zbërtheu grupin kriminal ku ishin pjesë vëllezërit Hoxhosmani falë komunikimeve në Sky dhe Encrochat. Prokuroria e Posaçme kishte nisur hetimet për grupin kriminal që kishte planifikuar atentatin ndaj ish-Prokurorit Arjan Ndoja dhe gjatë këtyre hetimeve u zbulua edhe ky grup. Emra të njohur të botës së krimit, si Palurent Dervishaj, i penduari Erion Alibej, por edhe vëllezërit Hoxhosmani ishin pjesë e grupit me 16 anëtarë në total që trafikuan të paktën 6 ton kokainë, me vlerë tregu 411 milionë Euro. Aktiviteti i tyre, sipas SPAK ka kulmuar në vitin 2020.