Numri i personave që kanë humbur jetën në Xhamajka si pasojë e uraganit Melissa është rritur në 28, njoftoi kryeministri i vendit të Karaibeve. Andreë Holness konfirmoi nëntë vdekje të tjera, duke shtuar se kishte raportime për viktima të mundshme që ende po verifikohen cka edhe sugjeron se shifra mund të rritet ende. Ekipet e ndihmës së shpejtë dhe agjencitë e ndihmës kanë pasur vështirësi të arrijnë në pjesë të caktuara të ishullit pas stuhisë për shkak të rrugëve të bllokuara, mbeturinave dhe përmbytjeve. Uragani i kategorisë pesë, më i forti i mundshëm, ka shkaktuar dhjetëra vdekje në të gjithë Karaibet, duke sjellë erëra të fuqishme dhe rrëshqitje dheu në Kubë dhe Haiti. Shkalla e plotë e shkatërrimit që Melissa shkaktoi në Xhamajka është bërë e qartë vetëm në ditët e fundit, pasi uragani shkatërroi sistemet e komunikimit dhe energjinë elektrike në pjesën më të madhe të ishullit. Komunitetet në pjesën perëndimore të ishullit, si Black River dhe Montego Bay, kanë parë shkatërrimin më të madh. Imazhe që tregojnë ndërtesa të rrafshuara me tokën, mbeturina dhe sende të shpërndara në rrugë dhe lagje të tëra ende nën ujërat e përmbytjeve, janë publikuar në rrjet. Kryqi i Kuq thotë se 72% e njerëzve në të gjithë Xhamajkën ende nuk kanë energji elektrike dhe rreth 6,000 janë në strehimet emergjente. Zyrtarët xhamajkanë konfirmuan për agjencinë e lajmeve AFP se po ngriheshin spitale tokësore për të trajtuar njerëzit në zonat më të prekura në perëndim. Ndihma që arrinte tek ata që kishin nevojë fillimisht u pengua nga mbyllja e përkohshme e aeroporteve të Xhamajkës. Tani që ndihma po mbërrin në vend, rrëshqitjet e dheut, linjat e rrëzuara të energjisë dhe pemët e rrëzuara i kanë bërë disa rrugë të pakalueshme duke e vështirësuar shpërndarjen e saj. Melissa është bërë stuhia më e fuqishme e regjistruar ndonjëherë që ka goditur Xhamajkën dhe një nga më të fortat që është parë në Karaibe. Në kulmin e tij, uragani kishte erëra me shpejtësi 295 km/orë. Të paktën 31 persona janë vrarë në Haiti si pasojë e uraganit Melissa, ndërsa të paktën dy vdekje janë raportuar në Republikën Dominikane. Në Kubë, mijëra njerëz janë evakuuar pasi më shumë se 60,000 shtëpi janë dëmtuar ose shkatërruar.