Kryeministri Edi Rama mblodhi kryebashkiakët këtë të shtunë, ku nga Durrësi, epiqendra e përmbytjeve të fundit, u kërkoi që të bëjnë më shumë për mbrojtjen e mjedisit dhe hedhjes së shisheve platike në territor. ‘Në këto kushte, sigurisht që nuk ka shumë për të bërë në aspektin e përballimit të intensitetit të lartë të reshjeve, por patjetër që ka elementë të kësaj situate që lidhen me njeriun. Dhe pamë se si kjo situatë u ndërlikua, ndër të tjera, edhe nga papërgjegjshmëria rrëqethëse e shumëkujt ndër ne, që si qytetar i kësaj republike apo si vizitor shqipfolës kryesisht, sepse nuk janë turistët e huaj që hedhin mbetje plastike në konsumin e tyre të përditshëm nëpër rrugë, e konsideron këtë vend si një landfill kudo ku ndodhet dhe hedh shishen e zbrazur të ujit apo të pijeve joalkoolike ose qesen plastike. Dhe e gjithë kjo sasi e madhe që hidhet rrugëve, ku këtu hyjnë edhe mungesa e një menaxhimi, ashtu siç do të duhej të mbetjeve të konsumit familjar në territoret rurale, mblidhet dhe, falë erës si fillim dhe falë ujërave të ngritur nga këto situata reshjesh intensive, bie dhe bllokon pika kyçe të rrjetit të kullimit, siç ndodhi në Shkozet, siç ndodhi në Gjirokastër, siç ndodhi në disa pika të tjera, për të mos i numëruar të gjitha, ku pavarësisht punës së bërë dhe për këtë ne kemi raportin e përditësuar të Ministrisë së Bujqësisë dhe detajet e këtij raporti lidhur me bashkëpunimin me çdo bashki, në nëntor ishin pastruar që të gjitha. Dhe përpara disa ditësh, kryetarja e Bashkisë së Durrësit më çoi një video se si po rimbushej prapë ajo pika kyçe atje në Shkozet, pasi u ripastrua edhe një herë në ato kushte bllokimi’, tha Rama.