Policia Rrugore e Vlorës ka arrestuar 7 drejtues mjetesh dhe ka vendosur mbi 1800 masa administrative gjatë 10 ditëve të fundit. Sakaq vetëm gjatë 24 orëve të fundit janë arrestuar në flagrancë 3 drejtues mjetesh që qarkullonin nën efektin e alkoolit. Bëhet me dije se masat administrative janë vendosur për shkelje të ndryshme të Kodit Rrugor, konkretisht për mosvendosjen e rripit të sigurimit, mosvendosjen e kaskës mbrojtëse, përdorimin e celularit gjatë drejtimit të mjetit, drejtim mjeti nën efektin e alkoolit, për shpejtësi tej normave të lejuara, për parakalime të gabuara dhe për ndalim apo qëndrim të gabuar. Policia Rrugore apelon për respektimin e rregullave të qarkullimit, pasi çdo shkelje mund të rrezikojë jetën e qytetarëve. Me qëllim rritjen e sigurisë rrugore dhe parandalimin e aksidenteve, Policia Rrugore e Drejtorisë Vendore të Vlorës ka vijuar me kontrolle të shtuara në të gjitha akset rrugore të qarkut.