Policia njofton se ka ekzekutuar 20 nga 33 masat e sigurisë të caktuara nga gjykata e Durrësit për skandalin e mbetjeve toksike të kompanisë ‘Kurum’. Masat janë ekzekutuar në Durrës, Tiranë dhe Elbasan, ndërsa 13 personat e tjerë, mes të cilëve dy shtetas turq janë ende në kërkim. Masat e sigurimit personal arrest me burg për 26 të akuzuar dhe arrest shtëpie për shtatë të tjerë u caktuan me kërkesë të prokurorisë për transportimin e 2800 tonë mbetje të rrezikshme të kompanisë Kurum nga porti i Durrësit drejt Tajlandës. Kontenierët me mbetjet, që pas analizave në Itali rezultuan toksike, vijojnë të qëndrojnë në zonën e Porto Romanos dhe ende nuk dihet se çdo të bëhet me to, si do të asgjesohen dhe ku. Anija me mbetje u nis pranverën e vitit 2024 me destinacion final Tajlandën, por ajo u bllokua në gusht të po të njëjtit vit, ndërsa në tetor u rikthye në ujërat territoriale shqiptare. Për transportimin e tyre janë nën hetim nga Prokuroria e Durrësit zyrtarë dhe ish zyrtarë të Agjencisë Kombëtare të Mjedisit, doganierë dhe punonjës të Portit të Durrësit, si dhe biznesmenë dhe administratorë biznesesh.