Autoritetet turke kanë arrestuar 37 persona për shkak të postimeve “provokuese” në rrjetet sociale në lidhje me arrestimin e kryebashkiakut të Stambollit, Ekrem Imamoglu, njoftoi Qeveria turke të enjten. Imamoglu, rivali kryesor politik i presidentit Recep Tayyip Erdogan, u arrestua të mërkurën nën akuzat për korrupsion dhe mbështetje të një grupi terrorist. Partia kryesore opozitare e ka cilësuar arrestimin e tij një “tentativë për të goditur presidentin tonë të ardhshëm”. Mijëra njerëz dolën në rrugë dhe në kampuset universitare në qytete të ndryshme, përfshirë Stambollin dhe kryeqytetin Ankara, për të protestuar me slogane kundër Qeverisë, pavarësisht se autoritetet i ndaluan protestat për katër ditë menjëherë pas arrestimit të Imamoglu. Autoritetet turke identifikuan 261 llogari në mediat sociale, duke përfshirë 62 jashtë vendit, që mbanin "postime provokuese që nxisin krim dhe urrejtje" pas arrestimit të Imamoglu, dhe po vazhdojnë përpjekjet për të gjurmuar të dyshuarit e mbetur, tha ministri i Brendshëm i Turqisë, Ali Yerlikaya, në platformën X. Ministri shtoi se 18.6 milionë postime rreth Imamoglu u shpërndanë në X brenda 24 orëve nga ndalimi i tij. Imamoglu, 54 vjeç, kryeson para Erdoganit në disa prej sondazheve në Turqi. Përveç ndalimit të protestave, autoritetet mbyllën disa rrugë dhe kufizuan aksesin në disa rrjete sociale. Turqia gjithashtu sekuestroi një kompani ndërtimi që është në bashkëpronësinë e Imamoglu dhe një kompani tjetër në pronësinë e tij. Shumica e 105 personave të arrestuar bashkë me Imamoglun janë pjesë e stafit të bashkisë së Stambollit.