Drone misteriozë u raportuan të fluturojnë mbi një bazë ushtarake që ruan armë bërthamore amerikane, dy herë në vetëm 24 orë. Një helikopter policie dhe një bllokues u vendosën me nxitim në një përpjekje për të ndjekur dhe ndërprerë valët e radios të tre pajisjeve që qëndronin pezull mbi bazën ajrore Kleine-Brogel në Peer të Belgjikës. Kjo vjen vetëm disa javë pasi NATO zbuloi se po rrit mbrojtjen e saj ajrore, ndërsa dronët mashtrues vazhdojnë të kërcënojnë aeroportet dhe bazat evropiane. Sipas Ministrit belg të Mbrojtjes Theo Francken, dronët u panë mbrëmjen e të shtunës duke fluturuar "në lartësi më të mëdha" dhe ishin në një "mision të qartë" që synonte bazën ushtarake. Në një postim në X, ai bëri thirrje urgjente për më shumë fonde për t'iu kundërvënë kërcënimit, duke shtuar se helikopteri dhe bllokuesi nuk patën sukses në pengimin e pajisjeve. Fluturimet shkelën sigurinë në atë që konsiderohet si një nga pikat ushtarake më të ndjeshme të Evropës, për të cilën besohet gjerësisht se strehon armë bërthamore amerikane. Ky është inkursioni i dytë në bazë në vetëm 24 orë, me dronë të paidentifikuar të parë mbi zonë edhe të premten në mbrëmje. Kleine Brogel thuhet se ruan bomba gravitacionale amerikane dhe konsiderohet me vlerë të jashtëzakonshme strategjike për NATO-n. Gjithashtu baza do të strehojë avionë luftarakë të përparuar F-35 deri në vitin 2027, duke rritur më tej shqetësimet për sigurinë. Pamjet e fundit të dronëve vijnë ndërsa Evropa përballet me kërcënime të vazhdueshme të sigurisë ajrore. Në muajt e fundit, kontinenti ka parë përballje me avionë luftarakë rusë, pamje misterioze të dronëve dhe aktivitete të koordinuara sabotimi që dëmtuan operacionet në aeroportet kryesore.