Maturantët të cilët nuk mundën që të kalonin në provimet e mbajtura në qershor kanë dhe një shans të dytë me të ashtëquajturat provimet e vjeshtës. Ministrja e Arsimit, Besa Shahini, ka firmosur urdhrin për datat e provimeve për nxënësit mbetës të maturës. Sipas urdhrit të nënshkruar nga Shahini, bëhet me dije se sesioni i provimeve të vjeshtës do të nisë nga 24 gushti dhe do të përfundojë në 3 shtator 2020. Provimi i gjuhës së huaj do të zhvillohet i pari më 24 gusht, më pas vijohet më 27 gusht me provimin e gjuhës shqipe dhe letërsisë, matematika është më 31 gusht dhe në 3 shtator do zhvillohet provimi i fundit ai i lëndës me zgjedhje. Sipas urdhrit të ministres Shahini edhe për provimet e shkollave profesionale do të jenë të njëjta data me ndryshimin se më 3 shtator maturantët e tyre do të japin provimin e lëndës Teori profesionale e integruar. Edhe në provimet e vjeshtës pyetjet do të jenë të ndërtuara me alternativa dhe do të zgjasin dy orë e 30 minuta.