Tre persona u vranë të mërkurën nga të shtënat në ambientet e gjimnazit në Sanski Most, në veriperëndim të Bosnje Hercegovinës. Sulmuesi tentoi më pas të vriste veten dhe u plagos rëndë. Ai qëlloi me armë automatike në drejtim të tre punonjësve të shkollës, duke vrarë drejtorin, sekretaren dhe një mësuese të gjuhës angleze, konfirmoi Adnan Beganoviq, zëdhënës i policisë rajonale. Autori i dyshuar i vrasjeve është një 68 vjeçar, portier i shkollës së mesme në Sanski Most. "Hetimet janë në vazhdim e sipër dhe ende nuk dihen motivet dhe rrethanat e këtij sulmi", tha Beganoviq. Sipas policisë, autori i sulmit u transferua në Qendrën Klinike Universitare në Banja Llukë. Burime spitalore thanë se pacienti kishte mbërritur me një plagë në gjoks, të shkaktuar nga arma e zjarrit dhe do ti nënshtrohet procedurave kirurgjikale. Shkolla nuk ishte rihapur ende për shkak të pushimeve verore, ndaj nuk është përfshirë asnjë fëmijë.