Izolimi në shtëpi i ish kryeministrit Sali Berisha, me vendim të gjykatës së posaçme antikorrupsion, nuk cënon mandatin e tij si deputet i Kuvendit të Shqipërisë. Neni 71 i Kushtetutës parashikon se mandati i deputetit mbaron ose është i pavlefshëm kur mungon pa arsye mbi 6 muaj rresht në Kuvend. Nëse arresti në shtëpi i Berishës zgjat për gjashtë muaj, vendimi gjyqësor që i pamundëson pjesëmarrjen në seancat plenare dhe në komisionet parlamentare, konsiderohet si arsye e mjaftueshme për mungesën e tij në Kuvend. Megjithatë në tejkalim të këtij afati kushtetues pritet të ofrohet gjitha asistenca e duhur juridike për të vendosur fatin e mandatit të ish kryeministrit. Në gjashtë muajt në vijim, pritet të ketë zhvillime në procesin gjyqësor të Berishës dhe të aksionit opozitar. Sinjalet e këtij aksioni, u dhanë në ditët e para të vitit, nga e bija e ish kryeministrit, zonja Argita Berisha Malltezi. Ndërkohë avokatët mbrojtës së ish kryeminitrit, Genc Gjokutaj dhe Sokol Mëngjesi po vijojnë betejën ligjore, duke e konsideruar procesin e ndjekur, antikushtetues, pasi në caktimin e masës së sigurisë ‘detyrim paraqitje dhe ndalim të daljes jashtë vendit’ nuk u kërkua autorizim nga Kuvendi. Shkelja e kësaj mase sigurimi, me pretendime për antikushtetueshmëri, u bë shkak për ashpërsimin e masës së sigurisë, nga detyrim paraqitje në arrest shtëpie.