Në Bosnje e Hercegovinë nisi të martën Marshi i përvitshëm i Paqes, në kujtim të viktimave të gjenocidit në Srebrenicë. Gjatë tri ditëve të ardhshme, mijëra pjesëmarrës do të përshkojnë rrugën që mijëra qytetarë të Srebrenicës kaluan verën e vitit 1995, në përpjekje për të shpëtuar nga forcat serbe. Pas një rrugëtimi prej rreth 110 kilometrash, që nis nga fshati Nezuk, pranë Tuzllës, ata do të arrijnë në Qendrën Përkujtimore Potoçari, ku më 11 korrik shënohet 30-vjetori i masakrës. Atë ditë, atje do të varrosen mbetjet e shtatë viktimave të masakrës që u gjetën dhe identifikuan gjatë vitit të kaluar. Më 11 korrik të vitit 1995, forcat serbe të Bosnjës hynë në Srebrenicë, në zonën që ishte shpallur e sigurt nga Kombet e Bashkuara.