Qytetarët në veri të Kosovës, e banuar me popullatë me shumicë serbe, janë hutuar të martën, për shkak se nuk kanë mundur të pajisen me letra ngjitëse në Qendrën e Regjistrimit në Mitrovicën e Veriut, për ti ngjitur ato mbi simbolet shtetërore në targat e automjeteve të tyre të regjistruara në Serbi. Për mbulimin me letra ngjitëse të simboleve shtetërore në targa, u arrit një marrëveshje mes Kosovës dhe Serbisë më 30 shtator, në Bruksel. Në Qendrën e Regjistrimit të Automjeteve në Zveçan, gjatë pasdites të së martës, kanë arritur vetëm 100 kuti me letra ngjitëse. Secila kuti përmban nga katër letra ngjitëse. Sipas marrëveshjes, që nga 4 tetori, të gjitha automjetet me targa të qyteteve në Serbi dhe qyteteve në Kosovë, të lëshuara nga Ministria e Brendshme e Serbisë, të cilat Kosova i konsideron të paligjshme, do të ngjisin letra ngjitëse mbi targa, për të pasur mundësi të lëvizin në territorin e Kosovës. E njëjta gjë vlen për të gjitha automjetet me targa ‘RKS’ që duan të lëvizin në Serbi. Por, në vendkalimet kufitare problemet janë të shumta, ndër të cilat edhe mungesa e letrave ngjitëse.