Maqedonia e Veriut mbajti këtë të dielë zgjedhet e 8-ta lokale, që nga shpallja e pavarësisë, zgjedhje në të cilat duket se ka një rënie të numrit të pjesëmarrësve. Sipas të dhënave nga Komisioni Shtetëror I Zgjedhjeve, deri në orën 18:30 janë raportuar se kanë marrë pjesë në votime 46.65% e të gjithë qytetarëve me të drejtë vote në Maqedoninë e Veriut. Sipas të dhënave zyrtare, në këtë proces që u mbyll në orën 19:00 të drejtë vote kishin 1.832.415 qytetarë të regjistruar në Listën Zgjedhore. Ata mund të votonin në 3.474 vendvotime në gjithë vendin për 309 kandidatë për kryetarë komunash dhe 576 lista kandidatësh për këshillat komunalë, apo gjithsej për 10.490 kandidatë. Në zgjedhje marrin pjesë 22 parti politike, 19 koalicione dhe 119 grupe votuesish, pra kandidatura të pavarura. Numri më i madh i kandidatëve për kryetarë komunash është në Qytetin e Shkupit – gjithsej 16 kandidatë.