Asnjë kamion me mallra me origjinë nga Serbia nuk ka hyrë në territorin e Kosovës, që kur Qeveria e Kosovës ka marrë vendimin për ndalimin e hyrjes se kamionëve me produkte dhe targa serbe në Kosovë dy ditë më parë. “Nuk kemi pasur asnjë hyrje, është duke u zbatuar masa e sigurisë për ndalimin e hyrjes”, tha zëdhënësi i Doganave të Kosovës Adriatik Stavileci. Qeveria e Kosovës, më 14 qershor, vendosi shtrëngimin e kontrolleve kufitare me Serbinë. Ky vendim u mor pas rrëmbimit të tre pjesëtarëve të Policisë së Kosovës nga forcat serbe. Kosova e konsideron arrestimin e tre zyrtarëve policorë si rrëmbim nga autoritetet e Serbisë në territorin e saj. Sipas Policisë së Kosovës, zyrtarët policorë janë arrestuar në Tresave/Bare që gjendet në komunën e Leposaviqit, brenda territorit të Kosovës.