Ministria e Punëve të Jashtme e Malit të Zi ka reaguar duke I cilësuar si të pabazuara dhe të paargumentuara, pretendimet e Ministrisë së Punëve të Jashtme të Serbisë, pas deklaratave të Malit të Zi për gatishmërinë për të mbështetur anëtarësimin e Kosovës në institucionet ndërkombëtare. “Përpjekjet për të paraqitur qëndrimet tona politike si kërcënim ndaj interesave të Serbisë janë plotësisht të pabazuara", thuhet në deklaratën e Malit të Zi. Sipas ministrisë malazeze është shqetësuese përpjekja për të cilësuar mbështetjen e Malit të Zi ndaj Kosovës, si një veprim antiserb. “Jemi të bindur se stabilitetin e rajonit nuk e rrezikojnë qëndrimet parimore dhe të shprehura qartë, por deklaratat publike që, duke relativizuar pavarësinë e shteteve fqinje, synojnë nxitjen e tensioneve dhe imponimin e një kornize të caktuar politike”, thuhet në reagim.