Situata me zjarret në Malin e Zi mbetet e rënduar, sidomos në Podgoricë. Në një konferencë të jashtëzakonshme për shtyp, Ministria e Punëve të Brendshme tha se dy helikopterë të ushtrisë po shuajnë vatrat e zjarrit që rrezikojnë njerëzit dhe shtëpitë në territorin e Podgoricës. Në të njëjtën zonë po vepron edhe një helikopter nga Serbia. Zjarre aktive janë raportuar edhe në katër qytete të tjera të vendit, kryesisht në pjesën qendrore dhe veriore. Ndërkohë, është ndërprerë qarkullimi në kanionin e Platijes, një nga rrugët që lidh kryeqytetin me veriun e Malit të Zi. Sipas Ministrisë së Punëve të Brendshme, avionët zjarrfikës “Canadair” nga Kroacia dhe Italia kanë shuar zjarre në bregdetin malazez, duke lëshuar mbi 300 tonë ujë mbi zonat e përfshira nga flakët. Pas ndërhyrjes, ata janë kthyer në vendet e tyre, siç ishte planifikuar, ndërsa rikthimi i tyre në Mal të Zi do të varet nga situata në terren. Presidenti Jakov Milatoviç bëri të ditur se Bosnje Hercegovina ka miratuar dërgimin e një helikopteri për ndihmë në Mal të Zi. Po ashtu, pritet edhe një helikopter nga Hungaria dhe një ekip prej 50 deri në 60 zjarrfikësish nga Austria. Autoritetet thanë se po përdorin dronë për të monitoruar terrenin, për të lokalizuar vatrat dhe për të identifikuar shkaktarët e zjarreve. Po ashtu, autoritetet e Podgoricës u kanë bërë thirrje pushuesve që të largohen nga lumenjtë Moraça, Zeta dhe Cijevna, në mënyrë që helikopterët të mund të marrin ujë për shuarjen e zjarreve. Të enjten ndërkohë, Mali i Zi do të jetë në Ditë Zie në nderim të ushtarakut Dejan Bozhoviç, i cili humbi jetën një ditë më parë gjatë përmbysjes së cisternës me ujë për shuarjen e zjarreve pranë Podgoricës. Kolegu i tij mbeti i plagosur rëndë.