‘Janë të papranueshme dhe përbëjnë ndërhyrje në punët e brendshme të Malit të Zi’, kështu I ka cilësuar ministria e Punëve të Jashtme e Malit të Zi veprimet e ambasadorit rus, Aleksandar Lukashiq. Arsye për reagimin kanë qenë deklaratat e ambasadorit Lukashiqit lidhur me vendimin e Kuvendit për bashkimin e Ushtrisë së Malit të Zi me mekanizmin e NATO-s për ofrimin e ndihmës së sigurisë dhe trajnimit për Ukrainën, si dhe komentet e tij negative për intervistën e presidentit Jakov Millatoviq. Ambasadori rus ishte shprehur se Mali i Zi është i përfshirë në zbatimin e “luftës hibride të NATO-s” kundër Moskës, pas intervistës së presidentit Millatoviq ku kishte deklaruar se anëtarësimi i Malit të Zi në BE është strategjia më e mirë në luftën kundër ndikimit të vendeve të treta, përfshirë Rusinë.