Agjentët e Europol shkatërruan me ndërhyrjen edhe të policisë portugeze dhe asaj spanjolle një grup të strukturuar kriminal që merrej me kontrabandën e duhanit. Grupi kriminal do të importonte nga Spanja në Portugali sasi të mëdha gjethesh duhani për të prodhuar kështu cigare dhe shitur në tregun e zi portugez. Në 24 qershor gjatë një operacioni që u zhvillua në të dy shtetet, u kontrolluan 59 shtëpi në Portugali dhe 4 të tilla në Spanjë, u arrestuan 8 shtetas portugezë dhe spanjollë të moshave 33-49 vjeç, si edhe u sekuestruan 11 tonë gjethe duhani, 90 000 cigare të paligjshme të prodhuara dhe 186.500 filtra cigaresh. Sasia e duhanit të sekuestruar është e mjaftueshme për të prodhuar rreth 11 milion cigare, me vlerë 2,7 milion euro në Portugali. Kriminelët administronin importin e duhanit përmes disa ndërmarrjeve të themeluara me qëllimin e vetëm për të kryer mashtrime të akcizës. Objektet e prerjes dhe përpunimit ishin vendosur në Spanjë, nga ku duhani transportohej në Portugali, ku ruhej në depo të ndryshme derisa të shpërndahej. Humbja e të ardhurave të gjeneruara nga këto produkte duhani të importuara në mënyrë të paligjshme nga Spanja në Portugali vlerësohet me më shumë se 2 milion euro.