Presidenti francez, Emmanuel Macron, pritet të vizitojë beogradin në shtator, dhe ai do të bëhet lideri i tretë i një fuqie të madhe që viziton Serbinë në vetëm katër muaj. Sipas mediave serbe, ky është një konfirmim se Serbia është vendi më i rëndësishëm në Ballkanin Perëndimor, por edhe se marrëdhëniet dypalëshe të vendit me Francën janë duke u thelluar, në radhë të parë në aspektin e bashkëpunimit ekonomik dhe ushtarak. Pas Xi Jinping, Presidentit të Kinës dhe Olaf Scholz, kancelarit të Gjermanisë, Macron po vjen në Serbi në një moment të ndjeshëm kur bota është e ndarë mes luftërave në Evropën Lindore dhe Lindjen e Mesme. “Fakti që Aleksandër Vuçiç së fundmi, ishte në Francë për një takim me Macronin, tregon se bashkëpunimi mes dy vendeve mund të zhvillohet me shpejtësi”, shkruan media serbe. Sipas njoftimeve, Macron duhet të vijë në Serbi më 5 ose 6 shtator. Presidenti aktual francez për herë të parë vizitoi Beogradin në korrik 2019, kur dy vendet festuan 180-vjetorin e vendosjes së marrëdhënieve diplomatike. Ekspertët vënë në dukje se Franca ka qenë historikisht fuqia perëndimore më e afërt me serbinë. Edhe tani, sipas tyre, vendi e identifikon serbinë si partnerin më të rëndësishëm në rajonin e ballkanit perëndimor.