Ndërsa diplomacia tenton në Stamboll, armët nuk heshtin, përkundrazi. Sulmi i kryer më 1 qershor nga Ukraina kundër katër bazave ushtarake ruse ka treguar edhe një herë se lufta mes Moskës dhe Kievit po zhvillohet gjithnjë e më shumë në qiell. Sipas inteligjencës ukrainase, u shkatërruan 41 bombardues rusë, ose 34 për qind e mjeteve strategjike, me një dëm ekonomik të vlerësuar prej 7 miliardë dollarësh. Operacioni "Rrjeta e Merimangës", i përgatitur prej 18 muajsh në fshehtësi të plotë; as Shtëpia e Bardhë nuk ishte e informuar, u ekzekutua me një flotë prej vetëm 117 dronësh, të fshehur në një shtëpizë druri, të aftë për të goditur objektiva mbi 4 mijë kilometra larg nga fronti zyrtar, si psh bazën Belaya, në rajonin rus të Irkutskut. Për disa qindra dollarë për çdo dron ukrainas, Federata Ruse humbi avionë me një vlerë prej rreth 350 milionë dollarë secili: një asimetri që nxjerr në pah se si dronët nuk janë më mjete të thjeshta taktike, por asete të vërteta strategjike të afta për të përmbysur ekuilibrin e konfliktit.