Autoritetet në Los Anxhelos njoftojnë se kushtet e motit janë të rrezikshme dhe se prej tyre mund të rindizen zjarret. Erërat që priten dhe thatësira përbëjnë një rrezik të lartë për zjarri në pjesën më të madhe të Los Anxhelosit, tha shefi i Zjarrfikësve të qarkut Los Anxhelosit, Anthony Marrone. Kurse drejtorja e Departamentit të Zjarrfikësve të Los Anxhelosit, Kristin Croëley, bëri të qartë se rreziku ende nuk është shmangur dhe kërkoi që të mos ulet vigjilenca. Autoritetet amerikane thonë se në zonën më të madhe të Los Anxhelosit, numri i njerëzve të vdekur nga zjarret e tmerrshme të ditëve të fundit ka shkuar në 24. Sipas raportit të fundit, 16 persona humbën jetën në zjarrin "Eaton" pranë Altadenës dhe Pasadenës, ndërsa tetë vdiqën në rajonin perëndimor pranë Paqësorit. Operacionet e shuarjes së zjarrit janë duke vazhduar, por zjarri ka përfshirë shumë godina dhe akoma nuk është nën kontroll. Kjo është një tjetër arsye pse autoritetet kanë frikë se numri i viktimave do të vazhdojë të rritet.Sipas të dhënave të zjarrfikësve Cal Fire, 12.000 ndërtesa u shkatërruan. Vetëm i ashtuquajturi "Zjarri Palisades" shkatërroi 9.500 hektarë, ndërsa zjarri "Eaton"shkatërroi rreth 5.660 hektarë. Sipas guvernatorit kalifornian Gavin Neësom, mund të duhen gjashtë deri në nëntë muaj për të pastruar rrënojat pas zjarreve në Los Anxhelos. E ndërkohë kanë shpërthyer edhe vjedhjet në shtëpitë e djegura apo ato të boshatisura. Policia ka arrestuar disa persona, mes të cilëve edhe një grabitës të veshur me uniformë zjarrfikësi. "Ka njerëz që do të bënin gjithçka për të shfrytëzuar viktimat të kësaj tragjedie”, tha shefi i Policisë së LOs Anxhelesit, Jim Mcdonnell. Që nga e premtja janë angazhuar për mbrojtjen e zonave edhe ushtarët e Gardës Kombëtare. Ditët e fundit janë angazhuar edhe më shumë autoritete për shuarjen e zjarreve, por deri tani nuk kanë arritur t'i fusin nën kontroll të plotë.