Një cift nga Ohajo, në SHBA, ka lindur një foshnje nga një embrion që ishte ngrirë prej më shumë se 30 vjetësh, duke vendosur një rekord të ri botëror. Lindsey dhe Tim Pierce, mirëpritën djalin e tyre, Thaddeus Daniel Pierce, të shtunën e kaluar me familjen që tha se gjithcka dukej si fantashkencë. Besohet se kjo është periudha më e gjatë e ngrirjes së një embrioni para një lindjeje të suksesshme. Rekordi i mëparshëm ishte shënuar nga një cift binjakësh që lindën në 2022, nga embrione të ngrira në vitin 1992. Familja Pierce ishte përpjekur të kishte fëmijë për shtatë vjet përpara se të vendosnin të adoptonin embrionin që Linda Archerd, 62 vjeç, krijoi me ish-bashkëshortin e saj në vitin 1994 përmes fertilizimit in vitro. Në atë kohë, Archerd fillimisht krijoi katër embrione. Një u bë vajza e saj që tani është 30 vjeç, dhe tre të tjerët mbetën në ruajtje. Pavarësisht ndarjes nga bashkëshorti i saj, ajo nuk kishte dashur të shkatërronte embrionet, por kishte zgjedhur t'i dhuronte ato për kërkime ose t'ia jepte një familjeje tjetër në mënyrë anonime. Ajo madje pagoi mijëra dollarë në vit për ruajtjen e embrioneve deri sa gjeti një agjenci për birësimin e tyre.