Rusia mbetet e hapur për bashkëpunim me Shtetet e Bashkuara, por nuk është optimiste për lidhjet ekonomike pavarësisht përpjekjeve të vazhdueshme të Uashingtonit për t'i dhënë fund luftës në Ukrainë, tha Ministri i Jashtëm rus Sergei Lavrov në një intervistë të publikuar të hënën. Lavrov përmendi atë që e quajti qëllimin e deklaruar të Shteteve të Bashkuara për “dominim ekonomik”. “Ne gjithashtu nuk shohim ndonjë të ardhme të ndritur në sferën ekonomike”, tha Lavrov. Zyrtarët rusë, përfshirë të dërguarin Kirill Dmitriev, kanë folur më parë për perspektivat për një rivendosje të marrëdhënieve ekonomike me Shtetet e Bashkuara si pjesë e çdo zgjidhjeje përfundimtare të luftës në Ukrainë. Por, megjithëse Presidenti Donald Trump ka folur gjithashtu për ringjalljen e bashkëpunimit ekonomik me Moskën dhe ka pritur homologun e tij rus Vladimir Putin në tokën amerikane që nga kthimi në Shtëpinë e Bardhë, ai ka vendosur sanksione të mëtejshme, të rënda, në sektorin jetësor të energjisë së Rusisë. Lavrov përmendi gjithashtu armiqësinë e Trump ndaj bllokut BRICS, i cili përfshin Rusinë, Kinën, Indinë, Brazilin dhe ekonomi të tjera të mëdha në zhvillim. "Vetë amerikanët krijojnë pengesa artificiale përgjatë kësaj rruge", tha ai. "Ne thjesht jemi të detyruar të kërkojmë mënyra shtesë dhe të mbrojtura për të zhvilluar projektet tona financiare, ekonomike, logjistike dhe të tjera me vendet e BRICS", tha ai.