Trafikimi masiv i narkotikëve, i rrjetëzuar në disa porte dhe rrugëkalime, ka vënë në lëvizje europolin, FBI-në amerikane, antimafjan italiane dhe autoritetet më të larta të shtatë shteteve të botës. Megaoperacioni u shtri në plot 80 vende dhe vuri në pranga 45 trafikantë të rrjetit kriminal, mes të cilëve 30 shqiptarë. Të arrestuarit trafikonin kokainë nga Amerika Latine në porte të ndryshme evropiane. Europol njofton se transporti i narkotikëve, nga ky grup kriminal kryhej nëpërmjet avionëve, anijeve, makinave dhe kamionëve. Mbi 600 oficerë në bashkëpunim të ngushtë me prokurorë dhe hetues zbarkuan në Spanjë, Belgjikë, Kroaci, Gjermani, Itali dhe Holandë, ku u zhvilluan disa aksione paralele. Një ekip i përbashkët hetimor u krijua midis Belgjikës dhe Spanjës vitin e kaluar, me ndihmën e Eurojust dhe Europol. Hetimet në Spanjë datojnë që prej vitit 2018, moment kur u arrestua një prej krerëve të grupit të krimit të organizuar, i cili aktualisht ndodhet në paraburgim.