Gjykatat në Kosova u kanë dhënë të drejtë bizneseve, të paktën përkohësisht në lidhje me urdhrin e Zyrës së Rregullatorit të Energjisë për zbatimin e reformës së liberalizimit të tregut. Një vendim i Gjykatës Komerciale të Kosovës, që u vu në lëvizje nga një biznes që kundërshtoi urdhrin e ZRRE pezullon përkohësisht këtë urdhër dhe krijon precedentin edhe për bizneset e tjera. Sipas vendimit të siguruar nga KosovaPress, gjykata komerciale ka pezulluar ekzekutimin e një njoftimi të ZRRE-së që i ndalonte një kompanie të caktuar furnizimin me energji elektrike përmes shërbimit universal. Vendimi i ZRRE e detyronte kompaninë në fjalë që të siguronte vetë furnizuesin në tregun e lirë. I njëjti njoftim u është dorëzuar prej 1 qershorit të gjitha biznesve të mëdha me mbi 50 të punësuar, ose me qarkullim vjetor mbi 10 milionë euro. Pas këtij vendimi, bizneset organizuan protesta duke paralajmëruar shtrenjtim të energjisë dhe rritje të kostos së prodhimit.