Pretenca në Hagë ngriti alarmin në Tiranë, jo vetëm për fatin e ish-krerëve të UÇK, por mbi të gjitha për fatin e historisë së popullit të Kosovës. Unanimisht deputetët e parlamentit të Shqipërisë miratuan deklaratën për pafajësinë e udhëheqësve të Ushtrisë Çlirimtare të Kosovës, duke bërë thirrje që instrumentet e drejtësisë të mos shndërrohen në mjete për rishkrimin e historisë apo për barazimin e viktimës me agresorin. Deklarata erdhi me propozim të Partisë Socialiste dhe u shkrua nga dy ish ministrat Igli Hasani dhe Tritan Shehu. “Kuvendi, duke mbajtur parasysh të vërtetën historike të luftës së UÇK-së, thekson se kjo ushtri ishte një lëvizje legjitime çlirimtare që luftoi për të drejtat e njeriut. Kuvendi vëren me shqetësim se kërkesa e Prokurorisë Speciale rrezikon të krijojë një shtrembërim të rrezikshëm të historisë, duke barazuar luftën legjitime të një populli për mbijetesë dhe liri me krimet e regjimit serb, që kreu spastrim etnik dhe krime kundër njerëzimit ndaj popullit të Kosovës”