Të dhënat e Eurostat tregojnë se Shqipëria renditet ndër vendet kryesore të Eruopës që janë pjesë e Bashkimit Europian për numrin e të miturve që marrin leje qëndrimi në vendet e unionit. Gjatë vitit 2024, 18,697 fëmijë shqiptarë nën moshën 18 vjeç morën leje të para qëndrimi në një nga vendet e BE-së, duke e pozicionuar Shqipërinë në vendin e tretë në Europë për këtë kategori pas Ukrainës dhe Bjellorusisë, shkruan Monitor që ka analizuar të dhënat e Eurostat. Migracioni kryesisht është përqëndruar në Itali me 44.1%, Greqi me 26.1%, dhe Gjermani me 22.3%. Ndërsa vendet e tjera mbajnë një numër shumë më të vogël. Lejet janë dhënë kryesisht për bashkim familjar, ndaj dhe Italia dhe Greqia që mbajnë numrin më të madh të emigtrantëve shqiptarë kanë dhe numrin më të madh. Ndërkohë, Gjermania është shndërruar në vitet e fundit në një destinacion të rëndësishëm si për punësimin e të rriturve, ashtu edhe për vendosjen e familjeve të reja. Në vitin 2024, vendet e BE-së lëshuan 540,445 leje të para qëndrimi për qytetarë jo-BE nën moshën 18 vjeç.