Efektivët e Gardës Civile në Spanjë kanë zbuluar plantacionin më të madh të drogës në zonën e Galicias dhe përgjegjës për kultivimin janë dy shtetas shqiptarë. Mediat spanjolle shkruajnë se plantacioni ndodhej në një livadh në Galicia në famullinë e Pedres. Pas informacioneve të marra në rrugë operative, agjentët e policisë kanë zbuluar plantacionin me një sipërfaqe prej 2500 metrash katrorë, ku ishin kultivuar saktësisht 3437 bimë kanabisi. Dy shqiptarët janë arrestuar në flagrancë dhe siç raportojnë mediat spanjolle, ato kanë mbetur të habitur kur policia mbërriti në plantacion. Ata jetonin në dy çadra ngjitur me plantacionin dhe kishin furnizime të duhura për të mbijetuar për një kohë të gjatë, pa patur nevojë të lëviznin nga ajo zonë. Autoritetet spanjolle konstatuan materiale të ndryshme që u shërbenin shqiptarëve për të kultivuar kanabisin, si lopata, kazma, plehra kimike dhe produkte të ndryshme kopshtarie. Aksioni antidrogë përfundoi me asgjësimin e bimëve narkotike, ndërsa dy shqiptarët akuzohen për trafik droge sipas kodit penal spanjoll.