Përfaqësuesi special i Bashkimit Evropian për dialogun ndërmjet Kosovës dhe Serbisë, Miroslav Lajçak, do të takohet gjatë ditës me këshilltarët diplomatikë të liderëve të Francës, Gjermanisë dhe Italisë, bëjnë të ditur burime nga Brukseli. Sipas këtyre burimeve, në takim do të jetë edhe i dërguari amerikan për Ballkanin Perëndimor, Gabriel Escobar. Ky takim i jashtëzakonshëm pason sulmin ndaj pjesëtarëve të Policisë së Kosovës në fshatin Banjskë në veri të Kosovës, të dielën, ku mbeti i vrarë një polic. Bashkësia ndërkombëtare e dënoi ashpër sulmin ndërkohë që bashkimi evropian, doli dy herë me komunikata. Shefi i diplomacisë evropiane, Josep Borrell, e vlerësoi sulmin si agresion, dhe aktin si "terrorist". Por, opinioni publik në kosovë, dhe zyrtarë të qeverisë së Kosovës, kanë reaguar me shqetësim, pasi në deklaratat e Bashkimit Evropian, mungon etiketimi si terroristë për agresorët serbë që sulmuan policinë e Kosovës.