I dërguari i posaçëm i Bashkimit Evropian për dialogun Kosovë-Serbi, Mirosllav Lajçak, po takohet në Prishtinë me kryeministrin e Kosovës, Albin Kurti. Kjo është vizita e dytë në Kosovë në më pak se një muaj e Lajçakut. Ai më 15 shtator ishte takuar me Kurtin dhe zëvendësin e tij, Besnik Bislimi. Diplomati evropian kishte thënë se qëllimi i vizitës së tij në Prishtinë kishte qenë “çuarja përpara” e procesit të dialogut që ndërmjetësohet nga BE-ja. Vizita e Lajçakut në Kosovë po ashtu vjen në kohën kur mediat kanë raportuar se Franca dhe Gjermania, u kanë paraqitur Kurtit dhe presidentit të Serbisë, Aleksandar Vuçiç, një propozim për zgjidhjen e mosmarrëveshjeve. Vuçiç ka thënë më herët se Parisi dhe Berlini kanë propozuar që vendi i tij të lejojë që Kosova të anëtarësohet në institucione dhe organizata ndërkombëtare, përfshirë Kombet e Bashkuara, në këmbim të anëtarësimit të shpejtë të Serbisë në BE. Por Kurti tha se nuk kishte një propozim për marrëveshje finale.