Autoritetet greke kanë zbuluar një laborator të sofistikuar për përpunimin e kokainës në Athinë, ku lëkura të importuara nga Bolivia përdoreshin për të fshehur drogën. Në këtë operacion, që u zhvillua nga forcat speciale EKAM u arrestuan 11 persona, përfshirë tre shqiptarë Robert Muci, Skënder Kallashi dhe Ledvis Hoxha. Ndërkohë, organizatori i dyshuar i trafikut ndërkombëtar, Luis Murataj, i njohur si "Karteri" është ende në kërkim dhe dyshohet se ndodhet në Spanjë. Sipas hetimeve, grupi kriminal kishte krijuar një kompani fiktive për importin e lëkurave nga Amerika Latine në Greqi, të cilat më pas përpunoheshin në një depo të marrë me qira ku ndodhej laboratori sekret. Nga 200 lëkura të përpunuara janë nxjerrë rreth 100 kilogramë kokainë, ndërsa nga sasia e mbetur llogaritet se mund të prodhoheshin rreth 700 kilogramë të tjera. Në total janë arrestuar 11 persona, 6 grekë, 3 shqiptarë, 1 kolumbian dhe 1 bolivian.