Pavarësisht tentativave të demokratëve dhe paralajmërimit për kallëzim penal ndaj Niko Peleshit, qëndrimi i të majtëve mbetet i palëkundur për të pritur vendimin e Gjykatës Kushtetuese sa i takon çështjes ‘Balluku’. Në një njoftim zyrtar, Kuvendi deklaron se sesioni i ri parlamentar do të nisë më 19 janar dhe gjatë ditës së hënë do të bëhet i ditur kalendari i punimeve, si dhe do të nxirren urdhrat përkatës për seancën hapëse, Konferencën e Kryetarëve, Mbledhjen e Byrosë së Kuvendit, si dhe për Këshillin e Rregullores, Mandateve dhe Imunitetit, organi i cili shqyrton kërkesën e SPAK për heqjen e imunitetit të numrit dy të qeverisë, Belinda Ballukut. Ndërkohë kryetari i kuvendit, Niko Peleshi do të ketë një agjendë të ngjeshur ndërkombëtare në fund të muajit janar. Shoqëruar nga një delegacion deputetësh, ai do të udhëtojë drejt Italisë në datat 14-15 janar ku do të takohet me Presidentin e Dhomës së Deputetëve, Lorenzo Fontana, si dhe me Presidentin e Senatit, Ignazio La Russa.