“Kuvendi gjithëserb” është një projekt i rrezikshëm i presidentit të Serbisë, Aleksandar Vuçiç, që lidhet drejtpërdrejt me përpjekjet e Rusisë për të destabilizuar Evropën Juglindore dhe për të larguar vëmendjen nga agresioni i saj në Ukrainë, tha kryesuesi i Presidencës së Bosnje e Hercegovinës, Denis Beqiroviç. I ashtuquajturi “kuvend gjithëserb” u mblodh të shtunën në Beograd, ku udhëheqës të Serbisë dhe të entitetit serb të Bosnjës, Republika Sërpska, bënë thirrje për unitetin e serbëve në të gjithë rajonin. Ai u organizua nën sloganin “Një popull, një kuvend - Serbia dhe Sërpska” dhe përfundoi me të ashtuquajturën Deklaratë për mbrojtjen e të drejtave kombëtare dhe politike dhe të ardhmërisë së përbashkët të popullit serb. Presidenti serb, Aleksandar Vuçiç, tha se gjuha e deklaratës është zgjedhur me kujdes dhe se ajo fokusohet te Kosova, merr parasysh Marrëveshjen e Dejtonit që i dha fund luftës në Bosnje në vitet ’90 dhe nuk e përmend ndarjen e Bosnjës. Ai, megjithatë, shtoi se Serbia “nuk do ta braktisë kurrë Republikën Sërpska”. Beqiroviç tha se “kuvendi gjithëserb” kërcënon bashkëpunimin paqësor dhe të barabartë midis shteteve evropiane. “Një skenar i tillë i shkon për shtat vetëm Rusisë së Putinit dhe për këtë arsye nuk është rastësi që zyrtarët më të lartë rusë e kanë përkrahur publikisht mbajtjen e ‘kuvendit gjithëserb’”, tha Beqiroviç. Ai shtoi se organizimi i një kuvendi tërësisht serb është në kundërshtim me praktikat e një bote demokratike dhe të civilizuar, e cila respekton ligjin ndërkombëtar, dhe paraqet “një hap jashtëzakonisht të rrezikshëm”. “Asnjë kryetar shteti në Evropën moderne nuk do të mendonte të organizonte një kuvend ‘gjithëfrancez’, ‘gjithëgjerman’, ‘gjithitalian’, ‘gjithëpolak’, ‘gjithëspanjoll...”, tha Beqiroviç.