Gjykata Kushtetuese ka pranuar kërkesat e qeverisë për të shqyrtuar nëse masat shtrënguese ndaj zv.Kryeministres Belinda Balluku janë tejkalim kompetencash nga gjykata e posaçme. Kolegji penal prej tre anëtarësh i Kushteuteses kaloi për shqyrtim nga trupa e plotë e gjykatës të kësaj kërkese, bashkë me kërkesën për të ngrirë pezullimin nga detyra të Ballukut, që qeveria thotë se cenon funksionimin normal të saj. Ndërkohë, zëvendës kryeministrja, Belinda Balluku ka ankimuar në Apelin e Posaçëm masat e sigurisë të vendosura nga shkalla e parë e gjykatës së posaçme më datë 22 nëntor. Balluku, që njëkohësisht mban edhe postin e ministres së Infrastrukturës dhe Energjisë kundërshton në Gjykatën e Apelit të Posaçëm masat e sigurisë pezullim nga detyra dhe atë të ndalimit të daljes jashtë vendit.