Gjykata Kushtetuese e Kosovës ka marrë vendim mbi seancën konstituive të Kuvendit të Kosovës, sipas të cilit , zgjedhja e kryetarit të Kuvendit duhet të bëhet përmes votimit të hapur dhe brenda afatit 30-ditor nga mbledhja e parë e Kuvendit. Në aktgjykimin e saj gjykata konstatoi se kryesuesi i seancës konstituive, Avni Dehari nuk ka vepruar në përputhje me vendimin e mëhershëm të 26 qershorit. Si rrjedhojë, ajo shpalli të pavlefshme të gjitha seancat e mbajtura nga 27 qershori deri më 6 korrik. Gjykata ka urdhëruar që të vazhdohet me pikën 3 të rendit të ditës, të miratuar më 8 prill të këtij viti, duke ftuar përfaqësuesin e grupit më të madh parlamentar të propozojë kandidatin për kryetar të Kuvendit. Zgjedhja duhet të bëhet përmes votimit të hapur, me maksimumi tre raunde për të njëjtin kandidat. Po ashtu, të gjithë deputetët e zgjedhur duhet të jenë të pranishëm dhe të marrin pjesë në votim gjatë zgjedhjes së kryetarit dhe nënkryetarëve të Kuvendit.