Pas vendimit të Gjykatës Kushtetuese për të pezulluar dekretin e Presidentit Bajram Begaj për zgjedhjet në Tiranë, ka reaguar institucioni i Presidencës që ka theksuar se do të respektojë këtë verdikt. “Në përgjigje të interesit të mediave, ju bëjmë me dije se Institucioni i Presidentit të Republikës respekton vendimin e Gjykatës Kushtetuese për pezullimin e pjesës që përcakton datën e zgjedhjeve vendore në Bashkinë e Tiranës të dekretit me nr.350, datë 01.10.2025.”, njoftoi Presidenca. Gjykata Kushtetuese vendosi që të marrë në konsideratë paditë e bëra nga kryebashkiaku I Tiranës, Erion Veliaj për rrëzimin e dekretit të presidentit Begaj për mbajtjen e zgjedhjeve të pjesshme vendore më 9 nëntor. Kushtetuesja vendosi të pezullojë vetëm pjesën e Tiranës ndërsa në bashkitë e tjera do të mbahen zgjedhjet e parashikuara. Avokatët Mbrojtës të Veliajt iu drejtuan Kushtetueses me dy kërkesa, njërën për shkarkimin e tij, dhe tjetrën për dekretin e presidentit. Kërkesat e Veliajt do të diskutohen nga Kushtetuesja më datë 31 tetor, ku dhe do të merret një vendim përfundimtar. Presidenti Begaj e argumentoi vendimin e dekretit, me nenin 62 të ligjit për Vetëqeverisjen Vendore. Erion Veliaj u shkarkua nga detyra nga Këshilli Bashkiak, me argumentin se mungon për një periudhë më shumë se tre muaj në detyrë. Vendium që më pas u miratua nga Këshilli I Ministrave dhe që iu dorëzua Begajt. Por edhe pse Veliaj iu drejtua Kushtetueses, presidenca vendosi që të dekretonte datën e zgjedhjeve, duke bërë që avokatët mbrojtës të Veliajt t’I drejtoheshin edhe njëherë Kushtetueses.