Dy të shumëkërkuar nga drejtësia u ekstraduan nga Franca e Greqia, njoftoi policia këtë të premte. Aksioni u finalizua pas bashkëpunimit të Interpol Tiranës me homologët e jashtë ku u konstatuan dy të akuzuarit. Viktor Daci, i akuzuar për vrasje me paramendim mbetur në tentativë dhe armëmbajtje pa leje, u ndalua në Greqi në vitin 2024 ku dhe fshihej prej disa vitesh. Ai u kap me një letër identifikimi false e më pas u zbulua nga policia. Ekstradimi i tij u bë pas përfundimit të procedurave ligjore. Ndërkohë nga Franca u ekstradua Paul Deda, ndaj të cilit GJKKO ka caktuar masën e sigurisë arrest me burg për trafik të lëndëve narkotike. Autoritetet thonë se po vijojnë punën për kapjen e të gjithë personave që po përpiqen t’i fshihen drejtësisë.