Fotografimi apo filmimi i votës për ta shfaqur më pas tek persona të tjerë është një dukuri që ka ndodhur ndër vite në Shqipëri dhe ka cënuar votën e lirë dhe të ndershme për qytetarët shqiptarë. Burimet bëjnë me dije se është shënuar edhe incidenti i parë në këto zgjedhje të përgjithshme parlamentare. Tek shkolla “Çajupi” në Tiranë një qytetar ka fotografuar votën. Kjo vepër penale është konstatuar nga komisionerët dhe menjëherë ka ndërhyrë policia për të vijuar me procedurat përkatëse. Sipas ndryshimeve në ligj, fotografimi apo filmimi i votës, që ta shfaqësh më vonë tek persona të tjerë konsiderohet vepër penale dhe dënohet nga 3 muaj deri në 3 vite burgim. Çdo qytetar në momentin që paraqitet në qendrën e votimit duhet të mos jetë i pajisur me celular apo me pajisje të tjera që mundësojnë fotografimin e votës, kjo për të garantuar lirinë e votës për qytetarët shqiptarë.