Formularët e delegatëve për mbledhjen e Kuvendit të Partisë Demokratike më 11 Dhjetor, fillimisht, u kyçën në kasafortë në zyrën e kreut të Këshillit Kombëtar me arsyetimin për ruajtjen e privatësisë dhe do të bëheshin publike ditën e Kuvendit të partisë. Por, në një ndryshim 180 gradë, vetë zyrtarë të degëve të PD-së, njëra pas tjetrës filluan të bënin transparencë, duke publikuar një për një emrat e delegatëve që kishin plotësuar formularët. Përmes një postimi në rrjetet sociale, ish-kryeministri Sali Berisha bën me dije se deri tani janë publikuar emrat e 2171 delegatëve që kanë firmosur për mbledhjen e Kuvendit Kombëtar të iniciuar nga ai. Teksa shpreh mirënjohje ndaj tyre, Berisha shprehet se përkundër mashtrimeve të peng-kryetarit, Kuvendi i 11 Dhjetorit është thirrur dhe legjitimuar sipas statutit nga vullneti i mijëra delegatëve demokrat.