‘Giorgia Meloni është një kurtizane në haremin e Donald Trump”. Ka qenë kjo deklarata e kreut të Sindikatës së Bashkuar të Punës në Itali, Maurizio Landini që ka ndezur një debat në Itali. Deklarata u bë në një studio televizive, ku Landini u përball menjëherë me kundërshtitë që e konsideruan deklaratën e tij seksiste. Landini u përpoq ta justifikojë deklaratën duke thënë se termi i përdorur prej tij ishte për të ilustruar mendimin se kryeministrja e Italisë, ashtu si shumë udhëheqës të tjerë të Europës janë sot nën tutelën e Donald Trump. Por, justifikimi nuk e bindi Kryeministren italiane, e cila reagoi në rrjetet sociale përmes një postimi duke treguar përkufizimin e fjalorit për fjalën kurtizane. “Të gjithë e dimë domethënien e rëndomtë të kësaj fjale, por për ata që ende nuk e dinë po publikoj këtu përkufizimin e parë të saj që gjendet me një kërkim të thjesht në internet”, shkruan Meloni. Në imazhin e publikuar, Kryeministrja italian rrethon përkufizimin e fjalës ‘prostitutë’, teksa shton se deklarata e Landinit është një shembull i shkëlqyer se si e majta, që për dekada me radhë bën moral për të drejtat dhe respektin e grave, në mungesë të argumenteve e kritikon një grua duke e quajtur prostitutë. I ashpër ka qenë edhe reagimi i zëvendëskryeministrit dhe ministrit të Jashtëm italian, Antonio Tajani. “Gjuhë vulgare dhe seksiste që tregon paaftësinë e disa burrave për të pranuar faktin që gratë sot nuk mund të jenë më inferiore dhe që ngatërrojnë lirinë e shprehjes me lirinë e ofendimit”, deklaroi Tajani. Deklarata është kritikuar masivisht edhe nga politikanë të tjerë dhe figura publike në Itali.