Kryeministri Albin Kurti ka zbuluar sot në Kuvend emrat e organizatorëve të protestave të dhunshme në Veri dhe të serbëve që sipas tij sulmuan ushtarët e KFOR-it duke plagosur 30 prej tyre, disa me armë zjarri. Kurti tha se rolin kryesor në organizimin e protestuesve ne terren janë duke e kryer anëtarët e formacionit ilegal të së ashtuquajtur Mbrojtje Civile dhe ish-pjesëtarë të Policisë së Kosovës ku është parë prezencë e madhe e tyre në terren. Por publikimi i kësaj liste me emrat e huliganëve serbë ka sjellë regime të ashpra nga Beogradi. Drejtori i Zyrës për Kosovën në Qeverinë e Serbisë, Petar Petkovic tha se kryeministri i Kosovës, Albin Kurti, ka shpallur një liste pushkatimi të cilën e lexoi në seancën e Kuvendit të Kosovës. “…sepse, njerëzit tanë në katër komunat në veri të Ibrit janë të bashkuar në rezistencën e tyre ndaj sundimit të terrorit të tij”, tha Petkovic, sipas një deklarate të lëshuar nga zyra e tij, e në të cilën kryeministri i Kosovës përshkruhet me shprehje fyese. Ai tha se me publikimin e saj, Kurti “ka marrë peng të gjithë ata banorë të Kosovës që duan vetëm paqe, stabilitet dhe mundësi për të jetuar në një shoqëri pak a shumë normale, në kohë paqeje”. Në komunikatën e Zyrës për Kosovën të Qeverisë së Serbisë thuhet, po ashtu, se Kurti e ka humbur mbështetjen e ndërkombëtarëve – pa u specifikuar se të kujt – dhe se po përpiqet ta pengojë me forcë largimin e tij “në histori politike”.