Kryeministri i Kosovës, Albin Kurti priti në një takim përfaqësuesin e posaçëm të BE-së për dialogun Kosovë-Serbi, Mirosllav Lajçak, dhe të dërguarin e posaçëm të SHBA-së për Ballkanin Perëndimor, Matthew Palmer. Kurti, tha se bashkëpunimi dhe koordinimi midis Bashkimit Evropian dhe Shteteve të Bashkuara, rreth procesit të dialogut midis Kosovës dhe Serbisë, “është i mirëseardhur, sepse është i domosdoshëm”. Dy zyrtarët po zhvillojnë një vizitë dy-ditore në Kosovë, në prag të rifillimit të dialogut midis Kosovës dhe Serbisë. Është paralajmëruar se Kurti dhe presidenti i Serbisë, Aleksandër Vuçiç, mund të takohen nga mesi i qershorit. Arsyeja e vizitës së përbashkët të Lajçakut dhe Palmerit thuhet se është pikërisht përgatitja e takimit Kurti-Vuçiç. Dialogu për normalizimin e marrëdhënieve midis Kosovës dhe Serbisë ka nisur qysh në vitin 2011. Procesi, i cili është ndërprerë disa herë, është ndërmjetësuar vazhdimisht nga Bashkimi Evropian dhe është mbështetur nga Shtetet e Bashkuara. Kurti tha të hënën, pas takimit me Lajçakun dhe Palmerin, se dialogu “duhet të jetë i drejtë, parimor dhe në shërbim të popujve dhe paqes e sigurisë në mbarë botën”.