Vetëvendosje mund të dështojë në formimin e qeverisë së re. Këtë ka lënë gtë nënkuptohet kryeministri në detyrë Albin Kurti gjatë një takimi me diasporën në Londër të martën. “Siç duket, alternativa është se do të shkojmë në zgjedhje prapë”, tha Kurti transmeton Radio Evrpa e Lirë. Presidentja Vjosa Osmani e mandatoi Kurtin më 11 tetor për të formuar qeverinë e re .Por ndërsa i kanë mbetur dhe pak ditë, Kurti ende nuk ka gjetur një parti për të formuar koalicionin. “Nuk është kollaj, se, s’di se si t’jua shpjegoj, ndoshta e keni dëgjuar edhe ju vetë, është intoksikuar atmosfera shumë, ka shumë xhelozi e inati e cinizëm shumë më shumë sesa ide, punë e pasion. Por, jemi ku jemi dhe do të përpiqemi ta bëjmë Qeverinë. Por, siç duket, alternativa është se do të shkojmë në zgjedhje prapë”, theksoi Kurti gjatë takimit. Vetëvendosje është nën presion pasi opsionet i ka të kufizuara. Kjo forcë politike ka përjashtuar bisedimet me PDK-në që doli e dyta në zgjedhje ndërsa ka lënë të hapur mundësinë me LDK. Por ende nuk ka bisedime mes palëve. Kurti udhëtoi për në Londër të hënën, për të marrë pjesë në Samitin e radhës të Procesit të Berlinit. Nëse Kurti dështon, atëherë Osmani do të thërrasë palët në takim dhe do të mandatojë forcën që ka më shumë pritshmëri për të formuar qeverinë, që në këtë rast është PDK. Por dhe nëse kjo dështon atëherë Kosova do të shkojë në zgjedhje të tjera.