Kryeministri i Kosovës, Albin Kurti, mori pjesë në Konferencën e Sigurisë në Mynih, ku zhvilloi një sërë takimesh me zyrtarë të lartë evropianë dhe ndërkombëtarë. Ai tha se në këto takime po prezanton arritjet e Kosovës, si dhe planet dhe objektivat strategjike të qeverisë për vitet në vijim. Duke iu referuar temës kryesore të konferencës, “Shkatërrimi”, Kurti u ndal te pasojat e agresionit rus në Ukrainë dhe kërcënimet globale ndaj sigurisë. Ai theksoi se Kosova paraqitet si një vend që kontribuon në demokraci, stabilitet dhe zhvillim rajonal, pavarësisht sfidave me të cilat përballet. Po ashtu, ai deklaroi se Kosova nuk ka kërcënime të brendshme për sigurinë, por përballet me sfida nga fqinjët veriorë. Sipas tij, vendi po investon ndjeshëm në forcimin e Policisë dhe Ushtrisë, në bashkëpunim të ngushtë me partnerët evropianë, për të rritur kapacitetet mbrojtëse dhe parandaluese. Nga Mynihu, Kurti përgëzoi gjithashtu Kuvendin e Kosovës për miratimin e marrëveshjeve ndërkombëtare, duke bërë të ditur se mbi një miliard euro janë aprovuar nga Banka Qendrore dhe Këshilli Evropian. Në konferencë, ai mori pjesë së bashku me zëvendëskryeministrin dhe ministrin e Jashtëm, Glauk Konjufca, si dhe ministrin e Mbrojtjes, Ejup Maqedonci.