Kryeministri i Kosovës, Albin Kurti ka udhëtuar këtë të hënë drejt Britanisë së Madhe, ku do të marrë pjesë në një konferencë ku do të diskutohet për sfidat e sigurisë me të cilat ballafaqohet Ballkani Perëndimor. Në një njoftim të zyrës së kryeministrit, thuhet se: “Në qëndrimin e tij njëditor atje, krahas takimeve me zyrtarë të institucioneve, ai do të marrë pjesë në panelin e diskutimit mbi sfidat e sigurisë me të cilat ballafaqohet Ballkani Perëndimor, të organizuar nga Instituti i Politikave Chatham House”. Vetë ky institut, ndërsa ka njoftuar për zhvillimin e konferencës, ka theksuar se shqetësimet e sigurisë nuk janë të reja për vendet e Ballkanit Perëndimor. “Është një rajon që ka përjetuar paqëndrueshmëri të vazhdueshme etnike, fetare dhe politike, si dhe cenueshmëri ndaj efekteve të luftës në Ukrainë. Ndërsa këto vende kanë kaluar tranzicionin e tyre politik dhe ekonomik, rreziqet mbeten për qeveritë e tyre dhe Evropën”, vijon njoftimi. Në konferencë do të diskutohet edhe për anëtarësimin e vendeve të Ballkanit Perëndimor në NATO dhe Bashkimin Evropian, si dhe për rolin e Britanisë së madhe në këtë drejtim.