Kryeministri kosovar ka reaguar lidhur me situatën e krijuar me Gjykatën Kushtetuese dhe tërheqjen e Presidentes Osmani nga kërkesa e saj, pasi gjyqtar i kësaj lënde ishte caktuar gjyqtari serb Radomir Llaban, që sipas Presidentes, angazhohet kundër rendit kushtetues të Kosovës. Teksa pranoi këtë shqetësim, Kurti tha se Vetëvendosje e ka ngritur zërin për gjyqtarin në fjalë që në vitin 2018, por institucionet e aso kohe nuk i morën parasysh ankesat e tyre. SInk “Presidentja Osmani nuk ka qenë në dijeni se ai do të jetë kryesues i çështjes që do të trajtohet nga Gjykata Kushtetuese. Ne që nga viti 2018 kemi qenë të informuar për gjyqtarin Radomir Llaban, atëherë kur ai pati aplikuar që të bëhet anëtar i Gjykatës Kushtetuese. Deputetja jonë në emër të Grupit Parlamentar të asaj kohe sa ishim në opozitë, Albulena Haxhiu, i pati shkruar letër Zyrës së Presidentit, mirëpo fatkeqësisht, as presidenti i atëhershëm në vitin 2018, as kryetarja e Gjykatës Kushtetuese e atëhershme nuk e kanë parë të arsyeshme që ta ndalin një proces të tillë sepse është absurde që dikush, i cili sipas informacioneve që kemi përmes institucioneve të sigurisë është i papërshtatshëm, me rrezik për rendin tonë kushtetues tash të gjykojë mbi një çështje kushtetuese”. Deklarata e Kurtit erdhi pas vizitës në Klinikën Kardiologjike në Prishtinë.