Ngërçin që klasa politike në Kosovë dështoi ta zgjidhë për 10 muaj, e zgjidhën qytetarët me votën e së dielës. Vetëvendosje e Albin Kurtit siguroi të paktën 56 mandate në zgjedhjet e parakohshme, teksa nuk janë numëruar ende votat e diasporës dhe votat me kusht, që mund ta çojnë këtë parti deri në 58 mandate në përfundim të procesit. Numrat i sigurojnë një shumicë të qëndrueshme në Kuvendin e ri, që pritet të konstituohet në janar, duke pasur parasysh që Kurti ka mbështetjen e pakicave joserbe, që kanë të rezervuara 10 mandate në Kuvendin e Kosovës.