Spiunët e Vladimir Putinit kanë përgjuar politikanë dhe zyrtarë të lartë britanik – tha një zyrtar i ministrisë së jashtme të londrës. Leo Docherty, pretendon se biseda private mes politikanëve të profilit të lartë dhe shërbyesve civilë, janë kompromentuar nga shërbimi rus i sigurisë gjatë përpjekjeve të vazhdueshme për të ndërhyrë në politikën britanike. Raportohet madje se ministria e jashtme ka thirrur ambasadorin rus në londër për të dhënë shpjegime dhe i është bërë e qartë atij se këto veprime kanë pasoja. Docherty ka dhënë informacion në dhomën e komuneve dhe sipas tij një fushatë kibernetike nga një grup i njohur si Star Blizzard, një nëndegë e njësisë kibernetike të FSB-së, ka siguruar dhe shpërndarë informacione delikate që nga 2015-a. Ministria e jashtme tha edhe se grupi ka bërë një procedurë të zakonshme, të njohur si spear-phishing për të vjedhur informacione nga një numër domethënës parlamentarësh nga parti të ndryshme politike. Deputetë, lordë, punonjës civilë, gazetarë, institute studimi dhe OJQ janë vënë në shënjestër. Ish shefi i shërbimit sekret të zbulimit, sër Richard Dearlove, ka konfirmuar madje për The Guardian, se vetë ai ka qenë një nga shënjestrat.